Shqiptari Aleksander Nilaj ndalohet nga emigracioni në SHBA

Shqiptari Aleksander Nilaj, themelues i organizatës bamirëse Open Hand Association Food Pantry në Bronx të Nju Jorkut, është ndaluar nga autoritetet amerikane të emigracionit më 13 tetor pas një seance në gjykatën e Manhattan-it. Ndalimi i tij vjen pasi Departamenti i Sigurisë Kombëtare deklaroi se ai kishte qëndruar përtej afatit që nga hyrja më 2006.

Sipas Departamentit të Sigurisë Kombëtare në SHBA, Nilaj kishte hyrë ligjërisht në vend në vitin 2006, por kishte tejkaluar qëndrimin e lejuar. Për këtë arsye, një gjykatës emigracioni kishte urdhëruar largimin e tij nga territori amerikan që më 22 korrik 2008.

Pas këtij veprimi të autoriteteve, familjarë, vullnetarë dhe banorë lokalë janë mobilizuar duke nisur një peticion online në platformën Change.org me titull “Release Bronx Food Pantry Founder Aleksander Nilaj and Keep 8,000 Neighbors Fed”. Organizata e tij, me seli në Lydig Avenue, u shërben çdo muaj nga 7.000 deri në 8.000 personave me të ardhura të ulëta, të moshuarve dhe njerëzve në nevojë. Drejtuesit e qendrës njoftuan se puna është ndërprerë sepse nuk e përballojnë dot ngarkesën dhe paralajmëruan se struktura rrezikon mbylljen e pacaktuar nëse ai nuk kthehet.

Avokati i Nilajt ka paraqitur tashmë një kërkesë ligjore për lirimin e tij nga ndalimi. Në anën tjetër, sipas medieve Documented dhe News 12, një gjykatës federal ka vendosur një urdhër që ndalon transferimin e Nilajt jashtë shtetit të Nju Xhersit pa u paraqitur më parë arsyetimi përkatës nga autoritetet përkatëse.

Ndërhyrje për këtë rast ka bërë edhe kongresmeni amerikan Ritchie Torres, i cili kërkoi lirimin e tij duke nëvizuar se autoritetet duhet të merren me persona me rrezikshmëri publike, ndërsa shtoi se Nilaj nuk ka precedentë penalë. Gjithashtu, kryetari i organizatës, Saimir Burgaj, deklaroi se «Për 14 vjet, ai është siguruar që njerëzit në nevojë të kenë ushqim në tryezat e tyre».