Qëlloi me çifte për kafshë të egra në Bulqizë — plagos një person
Autori ka qëlluar me armë gjahu tip çifte dhe dyshon se kishte kafshë të egra që po dëmtonin të mbjellat, pasi plagosi një person
Redaksia ZHURMA · · Përditësuar · 1 min lexim
Një person ka mbetur i plagosur mbrëmjen e kaluar në një zonë bujqësore të një fshati në Bulqizë. Ngjarja ka ndodhur rreth orës 23:00, ku sipas informacioneve paraprake, autori ka qëlluar me armë gjahu tip çifte, pasi ka dyshuar se në tokën e mbjellë ndodheshin kafshë të egra që po dëmtonin të mbjellat. Pas të shtënave, ai ka konstatuar se kishte plagosur një person.
I plagosuri është transportuar me urgjencë në Spitalin e Bulqizës, ku ka marrë ndihmën e parë mjekësore. Burime spitalore bëjnë me dije se gjendja e tij shëndetësore është e qëndrueshme dhe ndodhet jashtë rrezikut për jetën.
Ndërkohë, shërbimet e Policisë kanë mbërritur në vendngjarje, kanë kryer veprimet e para hetimore dhe kanë nisur punën për zbardhjen e plotë të rrethanave. Policia po administron dëshmitë dhe provat e mbledhura për të përcaktuar dinamikën e incidentit, ndërsa pritet marrja e masave procedurale ndaj autorit sipas rezultateve të hetimit.
Burim: Sinjali
— Redaksia ZHURMA
