Rritet kostoja e kredive dhe bien normat e interesit për depozitat e reja

Kreditë në Maqedoninë e Veriut shënojnë shtrenjtim, ndërsa qytetarët dhe kompanitë përballen me norma më të larta interesi gjatë marrjes së kredive të reja. Sipas të dhënave të Bankës Popullore, norma mesatare e interesit për kreditë e reja arriti në 4,94 për qind, duke shënuar një rritje prej 0,24 pikë përqindjeje. Shtrenjtimi më i madh vërehet te sektori i biznesit, ku interesi mesatar arriti në 5,05 për qind, ndërsa te familjet kjo normë u rrit në 4,77 për qind.

Në anën tjetër, normat e interesit për depozitat e reja shënojnë ulje. Norma mesatare për depozitat e reja të pranuara ra në 2,70 për qind, ku te depozitat e familjeve ka qenë 2,69 për qind, ndërsa te kompanitë 2,73 për qind. Dallimi mes normës së interesit për kreditë e reja dhe depozitat e reja arrin në 2,24 pikë përqindjeje, çka tregon se huamarrësit paguajnë dukshëm më shumë sesa fitojnë nga kursimet e vendosura në banka. Gjatë kësaj periudhe, kreditë e qytetarëve kanë arritur në rreth 4,93 miliardë euro, ndërsa depozitat kanë qenë më të larta për më shumë se dy miliardë euro.