Pal Lekaj dënohet me 3 vjet e 8 muaj burgim për rastin “53-milionëshi”

Gjykata Themelore në Prishtinë ka shpallur aktgjykimin ndaj ish-ministrit të Infrastrukturës, Pal Lekaj, duke e dënuar me 3 vjet e 8 muaj burgim efektiv për rastin e njohur si “53-milionëshi”. Rasti ka të bëjë me keqpërdorimin e detyrës lidhur me autostradën “Arbën Xhaferi” dhe pagesën shtesë prej 53.1 milionë eurosh ndaj kompanisë “Bechtel & Enka”.

Përveç Lekajt, në këtë proces gjyqësor janë dënuar edhe Eset Berisha, Nebih Shatri dhe Besim Tahiri. Eset Berisha u dënua me 3 vjet e 3 muaj burgim, ndërsa Nebih Shatri dhe Besim Tahiri u dënuan me nga 1 vit e 8 muaj burgim secili. Aktgjykimi u mor nga trupi gjykues i kryesuar nga kryetarja Violeta Namani-Hajra, së bashku me anëtarët Rrahman Beqiri dhe Donikë Shala-Abdyli.