OVL-UÇK: Gjykata Speciale është turpi i drejtësisë ndërkombëtare

Organizata e Veteranëve të Luftës së UÇK-së ka reaguar ashpër ndaj njoftimit të Dhomave të Specializuara të Kosovës lidhur me organizimin e 240 konferencave për media. Përmes një postimi në rrjetet sociale, organizata ka vënë në pikëpyetje mënyrën se theksohet transparenca e punës së kësaj gjykate. Sipas kësaj organizate, qytetarët nuk kanë nevojë për konferenca të shumta, por kërkojnë procese gjyqësore të paanshme, transparencë të vërtetë dhe respektim të të drejtave themelore të njeriut. Në reagimin e tyre drejtuar kryetares, thuhet: «Znj. Trendafilova, ju dhe Gjykata Speciale që udhëhiqni, jeni turpi i drejtësisë ndërkombëtare!».

Organizata ka shtruar gjithashtu shqetësimin nëse Dhomat e Specializuara kanë treguar të njëjtën transparencë lidhur me pretendimet e mbrojtjes, ankesat për kushtet e paraburgimit dhe pretendimet për shkelje të të drejtave të të akuzuarve. Sipas OVL-UÇK-së, një komunikim i tillë transparent nuk mund të përdoret si mbulesë për shkeljet e mundshme gjatë proceseve gjyqësore, duke theksuar se transparenca formale nuk zëvendëson drejtësinë thelbësore.

Siç raportoi Zhurma më 6 nëntor 2026, veteranët e UÇK-së kishin mbajtur më parë një aksion simbolik para zyrës së Bashkimit Evropian në Prishtinë, ku kishin kundërshtuar Gjykatën Speciale dhe kishin drejtuar akuza ndaj BE-së për financimin e saj.