Specialja: Kemi ndërgjegjësuar njerëzit e prekur nga proceset

Gjykata Speciale ka bërë të ditur se ndër vite ka ndërmarrë aktivitete për komunikim dhe ndërgjegjësim, duke synuar njerëzit që ndikohen nga proceset gjyqësore, siç thuhet në një postim të publikuar në platformën X. Sipas këtij institucioni, për shkak se gjykimet zhvillohen në Hagë, është vlerësuar që në fillim se komunikimi transparent, asnjanës dhe i qasshëm është i domosdoshëm. Programi për komunikim dhe ndërgjegjësim i DHSK-së synon të ofrojë informacione bazë për mandatin dhe aktivitetet, t'i japë mundësi njerëzve në Kosovë të shprehin pikëpamjet e tyre dhe t'u përgjigjet pyetjeve, përmes ngjarjeve të organizuara me studentë, juristë, shoqërinë civile dhe qytetarë të komuniteteve vendore. Po ashtu, që nga shtatori i vitit 2021 kur nisi gjykimi i parë, zëdhënësit kanë mbajtur 240 informime javore për shtyp përmes internetit për gazetarët. Ndërkohë, ndaj këtij institucioni janë drejtuar vazhdimisht kritika lidhur me mungesën e transparencës dhe qasjen në trajtimin e rasteve.