Osmani akuzon qeverinë për humbjen e 60.77 milionë eurove të BE-së

SHKUP — Nënkryetari i Bashkimit Demokratik për Integrim, Bujar Osmani, dhe zëvendësministrja e Transportit, Kaltrina Zekolli, janë përplasur ashpër përmes deklaratave publike lidhur me menaxhimin e fondeve evropiane për projektin e hekurudhës së Korridorit VIII. Debati nisi pasi Osmani akuzoi qeverinë e re se ka dështuar në nënshkrimin e kontratave brenda afatit.

Sipas Osmanit, Maqedonia e Veriut ka humbur në mënyrë të pakthyeshme 60.77 milionë euro nga fondet IPA të Bashkimit Evropian. Këto mjete ishin të destinuara për segmentin hekurudhor Kriva Pallankë–kufiri me Bullgarinë. Ai theksoi se ky korridor ka rëndësi strategjike për NATO-n dhe çdo goditje ndaj tij favorizon interesat ruse në rajon.

Zëvendësministrja Zekolli e ka kundërshtuar këtë qëndrim, duke e akuzuar Osmanin për gënjeshtra dhe manipulim të opinionit publik. Ajo deklaroi se projekti po ecën përpara dhe se tashmë janë siguruar 149 milionë euro grant për fazën e tretë, ndërsa po koordinohen hapat për realizimin e tunelit ndërkufitar me Bullgarinë.

Osmani i është përgjigjur kësaj deklarate duke shprehur keqardhje për fyerjet e saj. Edhe pse e përgëzoi zëvendësministren për takimin e fundit me palën bullgare, ai kujtoi se ky proces ishte nisur më shumë se katër vite më parë dhe pretendoi se puna e grupeve të përbashkëta kishte ngecur pikërisht me ardhjen e qeverisë së re.

Për më tepër, Osmani akuzoi shefin e saj, Aleksandar Nikollovskin, se përmes ekzibicioneve politike u përpoq t’i ridrejtonte mjetet nga Korridori 8, që lidh Shqipërinë me Bullgarinë, drejt Korridorit 10 ndërmjet Serbisë dhe Greqisë. Sipas tij, ky veprim solli situatën ku u humbën mbi 60 milionë euro nga fondet IPA.

Kjo nuk është përplasja e parë mes tyre, pasi më herët kanë pasur debate edhe për meritat e projektit të autostradës së papërfunduar Shkup-Bllacë. Ky debat i fundit vjen pas takimit në Sofje, ku u konfirmuan hapat për realizimin e hekurudhës ndërmjet dy vendeve fqinje.

Burim: TV21
— Redaksia ZHURMA