Rama: Kosova rrezikon t’i humbasë Lojërat Mesdhetare 2030

Kryetari i Prishtinës, Përparim Rama, ka bërë të ditur se Kosova rrezikon të humbasë të drejtën për organizimin e Lojërave Mesdhetare 2030, pasi Komiteti Ndërkombëtar i Lojërave Mesdhetare (ICMG) ka konfirmuar mungesën e përgjigjeve nga ana e institucioneve. Sipas tij, ndërsa Komuna i ka fituar të drejtat për këtë ngjarje sportive dhe ka përfunduar punët rreth masterplanit, projekteve dhe lokacioneve të votuara në Asamblenë e Kryeqytetit, faza e mëtejshme varet nga Qeveria qendrore dhe Komiteti Organizativ.

Rama ka kritikuar kryeministrin Albin Kurti, i cili udhëheq këtë komitet, duke vlerësuar se pasiviteti i qeverisë rrezikon një mundësi të rëndësishme për qytetarët. Përfaqësuesit ndërkombëtarë pritet që më 19 dhjetor të shqyrtojnë situatën dhe të thirrin një Asamble të Jashtëzakonshme për të marrë vendimin përfundimtar rreth këtij organizimi, i cili është cilësuar nga kryeqyteti si humbja më e madhe e mundshme për vendin.