Nafta kap nivele rekord në tregun vendas dhe arrin deri në 229 lekë për litër
Çmimet e karburanteve shënojnë rritje të ndjeshme në pikat me pakicë, duke iu afruar niveleve rekord të vitit 2022.
Çmimi i naftës dhe benzinës në tregun vendas ka arritur afër niveleve rekord të shënuara gjatë luftës në Ukrainë. Sipas një vëzhgimi, në pikat me pakicë nafta është tregtuar me çmim 226 deri 229 lekë për litër, nga 219 lekë për litër që ishte çmimi i mëparshëm, duke shënuar një rritje prej 7 lekë deri 10 lekë.
Shtrenjtim i çmimeve është regjistruar edhe për benzinën, e cila nga 205 lekë ka nisur të tregtohet me 216 dhe 219 lekë për litër, me një rritje prej 11 deri 14 lekë për litër. Kjo është rritja më e lartë e çmimit të karburanteve prej vitit 2022 kur nisi agresioni rus në Ukrainë, ndërkohë që në muajin mars 2022 çmimi i naftës kishte arritur nivelin rekord vetëm për një ditë në vlerën e 265 lekë për litër.
Rritja e çmimit në tregun vendas erdhi pas zhvillimeve në tregjet e huaja dhe rritjes së menjëhershme të çmimeve në bursa, ndërsa situata në tregjet ndërkombëtare u ndikua nga konflikti në Jemen dhe vështirësitë në transportin detar.
Burimet: Zhurnal.mk; Albeu; BalkanWeb; Shekulli; BoldNews (klaster 5 outlets).