Katër shqiptarë dënohen me burg në Angli për vjedhje në Londër

Katër shtetas shqiptarë kanë marrë dënime me burg në Angli, pasi hetuesit e Policisë Metropolitane shfrytëzuan të dhënat e kartave të udhëtimeve urbane për t'i lidhur ata me një varg vjedhjesh nëpër banesa në Londër, gjatë të cilave u morën sende me vlerë që e kalojnë shumën prej 8,000 paundësh, sipas njoftimeve të mediave.

Sipas autoriteteve policore, hetimet kishin nisur pas një sulmi në një shtëpi në Ruislip gjatë muajit shkurt, ndërsa efektivët përdorën kamerat e sigurisë CCTV, provat forenzike, si dhe analizën e telefonave dhe kartave Oyster për të zbardhur ngjarjet. Sipas Policisë Metropolitane, grupi kishte vënë në shënjestër banesat e familjeve që i përkisnin komunitetit të Azisë Jugore, nga ku u grabitën sende me vlerë të lartë si një orë Rolex prej 7,000 paundësh, vathë floriri prej 1,500 paundësh dhe një unazë antike me vlerë 1,200 paund.

Në Gjykatën Mbretërore të Isleworth, Çlirim Ferizi, 26 vjeç, banues në Tookey Close, Harrow, u dënua me dy vjet heqje lirie të enjten, më 20 gusht, kurse bashkëpunëtori i tij, Oresti Saliaj, 40 vjeç, banues në Wembley Park Drive, Brent, ishte dënuar më parë me tre vjet e gjashtë muaj burg më 22 prill në të njëjtën gjykatë. Rreshteri i detektivëve Ross Smith, i cili drejtoi operacionin e Policisë Metropolitane, deklaroi se këta persona synuan qëllimisht familjet në pronat e tyre dhe se provat e mbledhura ndihmuar për t'i vendosur ata në vendngjarje.

Hetimet zbuluan gjithashtu se më 30 janar, Saliaj bashkë me një person tjetër hynë me forcë në një shtëpi në Oakleigh Park North, Barnet, për të marrë një orë Rolex dhe bizhuteri, ndërsa më 27 shkurt Ferizi dhe Saliaj u panë në pamjet e kamerave duke udhëtuar me autobus drejt një banese në Shenley Avenue, Ruislip. Të nesërmen, të dy hynë në një pronë në Marsh Road, Harrow, ku kontrolluan dhomat me maska në fytyrë pa mundur të vjedhin gjë, ndërkohë që autoritetet vijojnë angazhimin e tyre për të ulur kriminalitetin në kryeqytetin britanik.