Drejtori Livoreka: Pse suksesi nuk kalon domosdo nga gjimnazi?
Drejtori i shkollës profesionale në Tetovë, Muzafer Livoreka, shpjegon planet për rritjen e praktikës dhe paragjykimet e prindërve ndaj zanateve.
TETOVË — Drejtori i shkollës profesionale në Tetovë, Muzafer Livoreka, së bashku me Teuta Zekirin në emisionin #TROÇ, ka deklaruar se në këto institucione nuk shkojnë më nxënësit e dobët, por ata që shfaqin talent. Sipas drejtorit, shkolla përpiqet që t'i motivojë të rinjtë përmes projekteve praktike.
Livoreka tregon se në të ardhmen planifikohet një sistem i ri i mësimit ku pjesën më të madhe do ta marrë puna praktike. Ai thekson se nxënësit nuk janë kundër zanatit, por paragjykimi kryesor vjen nga prindërit e tyre që kërkojnë vetëm shkolla të përgjithshme.
Sipas tij, shumë prindër janë ende të bindur se suksesi i nxënësve vjen domosdoshmërisht vetëm nga gjimnazi ose fakultetet. Kjo bindje shpesh bie ndesh me dëshirën dhe talentin e fëmijëve për të mësuar një zanat që u siguron atyre punësim të shpejtë.
Burim: Portalb
— Redaksia ZHURMA