MPB: 19 vepra penale për vozitje të pakujdesshme dhe 17 të ndaluar

Ministria e Punëve të Brendshme ka bërë të ditur se gjatë njëzet e katër orëve të fundit në territorin e vendit janë regjistruar 19 vepra penale për drejtim të pakujdesshëm të automjetit. Sipas njoftimit zyrtar, 17 persona janë privuar nga liria, ndërsa me një tjetër është zhvilluar bisedë zyrtare. Autoritetet shtojnë se 11 prej personave të përfshirë u kapën duke drejtuar mjete pa kaluar provimin për patentë shofer, duke përfshirë raste nga Shkupi, Kumanova dhe Tetova.

Në mesin e shkelësve janë regjistruar edhe dy të mitur, mes të cilëve një 16-vjeçar nga fshati Zdunjë që drejtonte një moped. Ndërkaq, gjashtë drejtues të tjerë janë kapur duke drejtuar automjete nën ndikimin e alkoolit me shifra të larta, ku veçohet rasti i një 29-vjeçari nga Manastiri me 3.23 promilë në gjak, si dhe raste të tjera në Shkup, Koçan, Makedonski Brod, Ohër e Strumicë. Policia po ashtu ka evidentuar një 20-vjeçar në Manastiri të përfshirë në një aksident me dëme materiale duke drejtuar një veturë pa targa e pa patentë, si dhe një rast tjetër me leje qarkullimi të skaduar.

Pas dokumentimit të plotë të rasteve do të pasojnë kallëzimet përkatëse penale. MPB-ja u bën apel pjesëmarrësve në trafik që të respektojnë rregullat e komunikacionit dhe u bën thirrje prindërve e kujdestarëve që të mos lejojnë të miturit të drejtojnë automjete pa plotësuar kushtet ligjore.