Zekolli: Autostrada Shkup-Bllacë lëshohet në përdorim në verën e 2030

SHKUP — Zëvendësministrja e Transportit, Kaltrina Zekolli, ka bërë të ditur se segmenti i dytë i autostradës Shkup-Bllacë pritet të lëshohet në përdorim në verën e vitit 2030, pasi tashmë kanë nisur punimet në terren dhe janë shpronësuar pjesa më e madhe e pronave private sipas të dhënave të Ndërmarrjes Publike “Rrugët Shtetërore”.

Ky projekt vjen pas përvojës së segmentit të parë prej 2 kilometrash të kësaj autostrade, i cili u zvarrit ndër vite gjatë ndërtimit dhe mbeti si një rrugë pa krye për disa vite rresht, ndërsa tani autoritetet synojnë përfundimin e plotë të trasesë së re prej 10,5 kilometrash.

Sipas Ndërmarrjes Publike “Rrugët Shtetërore”, traseja e segmentit të dytë do të shtrihet nëpër 304 prona të ndryshme private, ku deri më tani kanë mbetur vetëm 45 parcela pa u shpronësuar. Zëvendësministrja e Transportit, Kaltrina Zekolli, tha se procedura e shpronësimit po ecën mbarë dhe se më 26 gusht është dhënë leja për ndërtim nga Ministria e Transportit. Ajo shtoi se është dhënë një hapësirë prej 60 ditësh për realizuesin e punimeve dhe mbikëqyrësin për t'u akomoduar në terren me pajisje dhe zyra. Procedura e shpronësimit, sipas autoriteteve, po zbatohet në tri kategori: tokë bujqësore e kategorisë së tretë dhe të katërt prej 960 denarë për metër katror, tokë bujqësore e kategorisë së parë dhe të dytë prej 1200 denarë për metër katror, si dhe tokë ndërtimore pa leje ndërtimi prej 3000 denarë për metër katror. Për çështjet pronësore juridike po merret Byroja për ekspertizë ligjore, ku disa prej tyre kanë kaluar përmes instancave gjyqësore.

Në kuadër të projektit, i cili ka një afat ndërtimi prej 4 vitesh, janë paraparë 5 tunele në të dyja anët, 8 ura, 11 nënkalime, 4 galeri dhe 9 mure mbajtëse anësore, ose rreth 40 objekte në total. Kompania “Granit” ka firmosur kontratën me shtetin për ndërtimin e segmentit prej 10,5 kilometrash, ndërsa kostoja e përgjithshme do të jetë 222 milionë euro përfshirë pesë vjet mirëmbajtje pas inaugurimit. Financomi i investimit mbështetet nga një kredi prej 167,6 milionë eurosh nga Banka Evropiane për Rindërtim dhe Zhvillim, një grant prej 30,82 milionë eurosh nga korniza e Bashkimit Evropian për Ballkanin Perëndimor, si dhe 23,58 milionë euro nga buxheti i Ndërmarrjes Publike “Rrugët Shtetërore”. Ndërkaq, vetëm projektimi ka kushtuar 3,1 milionë euro përmes fondeve nga grantet për kompanitë projektuese SH.A. “Omega” dhe “Hill International”. Autostrada do të ketë dy korsi vozitjeje në secilin drejtim me gjerësi 3,5 metra, korsinë emergjente me gjerësi 2,5 metra dhe gjerësi totale prej 27,5 metrash.

Zëvendësministrja e Transportit, Kaltrina Zekolli, deklaroi: «Për projektin Shkup-Bllacë, siç e dini në muajin gusht më saktë me 26.08 dhamë leje për ndërtim si Ministri e Transportit, ndërsa pjesën tjetër e ka Ndërmarrja Publike “Rrugët Shtetërore”, të cilët janë si investitorë. Kanë filluar punimet në terren! Ka pasur një hapësirë 60 ditore për realizuesin e punimeve por edhe për mbikëqyrësin për t'ju dhënë leje për fillimin e ndërtimit, punëtorëve që do ta realizojnë këtë projekt, por edhe mbikëqyrësi që të akomodohet në aspektin e pajisjeve që do të sistemohen në terrenin ku do të punohet, zyrat e tyre ku do të mbikëqyrin realizimin e punimeve e kështu me radhë». Ajo shtoi gjithashtu: «Jam shumë optimiste dhe besoj që do të realizohet, siç e kemi theksuar se do të kryhen edhe më shpejtë. Mendoj që kur ka një vullnet politik, një seriozitet dhe jemi të vetëdijshëm për rëndësinë e këtij projekti. Por, nga ana tjetër e kemi të siguruar edhe buxhetin total, kemi koordinim të mirë me realizuesin dhe me mbikëqyrësin i cili u caktua. Si Ministri e Transportit kemi gjithashtu mbikëqyrje të vazhdueshme që bëjmë tek Ndërmarrja Publike “Rrugët Shtetërore”, nuk shoh ndonjë element që do ta pengonte ecurinë e punimeve».