Temperaturat arrijnë deri në 37 gradë në Maqedoninë e Veriut

SHKUP — Moti në Maqedoninë e Veriut gjatë ditës së sotme do të jetë kryesisht me diell dhe i ngrohtë, i shoqëruar me vranësira të pakta në mbarë territorin e vendit. Sipas parashikimeve meteorologjike, temperaturat maksimale për këtë ditë do të lëvizin në një vlerë prej 29 deri në 37 gradë Celsius.

Në orët e pasdites pritet të ketë ndryshime të lehta në zonat veriperëndimore të vendit. Në këto pjesë do të krijohen kushte për paraqitje të reshjeve të dobëta lokale të shiut, të cilat mund të shoqërohen me bubullima dhe në raste krejtësisht të rralla ekziston mundësia edhe për breshër.

Gjatë ditës së sotme do të fryjë erë e dobët deri mesatare në pjesën më të madhe të vendit. Ndërkohë, në pjesët perëndimore të vendit era herë pas here do të jetë e përforcuar duke fryrë nga drejtimi i veriut, ndërsa temperaturat mbeten të larta.

Në kryeqytet, në Shkup, moti gjithashtu parashihet të jetë i ngrohtë dhe kryesisht me diell, por me vranësira të pakta deri në mesatare. Do të fryjë erë e dobët deri në mesatare me drejtim të ndryshueshëm, ndërsa temperatura maksimale atje pritet të arrijë deri në 36 gradë.

Burim: TV21
— Redaksia ZHURMA