Qeveria harxhon vetëm 18% të buxhetit kapital — 130 milionë euro në gjashtë muaj
Ministria e Shëndetësisë harxhoi vetëm 1% të buxhetit kapital, ndërsa komunat shpenzuan rreth 93 milionë euro apo 36.9% të mjeteve të tyre.
PRISHTINË — Ministritë e Kosovës kanë shpenzuar vetëm 18 për qind të buxhetit të planifikuar për investime kapitale gjatë gjashtë muajve të parë të vitit. Nga gjithsej 720 milionë euro të parapara për 19 dikasteret qeveritare, janë realizuar vetëm 130 milionë euro, duke shënuar rënie krahasuar me gjashtëmujorin e parë të vitit të kaluar.
Sipas raportit zyrtar të qeverisë për të hyrat dhe shpenzimet, Ministria e Shëndetësisë ka shfaqur ngecjen më të thellë duke harxhuar vetëm 1 për qind të buxhetit kapital. Ndërtimi i Spitalit të Ferizajt, një nga projektet më të mëdha, ka regjistruar progres prej zero për qind gjatë kësaj periudhe gjashtëmujore.
Njohësi i politikave shëndetësore, Bujar Vitija, ka deklaruar se pasojat e kësaj ngecjeje po i vuajnë pacientët e rajonit të Ferizajt. Sipas tij, objekti aktual nuk plotëson as kushtet minimale, prandaj është jetike që Ministria e Shëndetësisë të vazhdojë urgjentisht punimet e bllokuara, pasi tenderi i ri tashmë është dhënë.
Kryetari i Odës Ekonomike të Kosovës, Lulzim Rafuna, e ka cilësuar shqetësues këtë nivel realizimi, pasi mjetet kapitale janë infuzion direkt për ekonominë dhe bizneset. Sipas tij, mosimplementimi i projekteve tregon joprofesionalizëm dhe joseriozitet të madh të qeverisë përballë premtimeve dhe rritjes më të fortë të mirëqenies sociale.
Për dallim nga ministritë, komunat kanë treguar performancë më të lartë duke realizuar 36.9 për qind të buxhetit kapital deri në qershor. Nga 252.5 milionë euro të planifikuara, komunat kanë shpenzuar rreth 93 milionë euro.
Burim: Koha.net
— Redaksia ZHURMA
