Mësimi tërëditor pritet të zgjerohet në tri ose katër shkolla të tjera në Prishtinë
Prindërit kërkojnë ristrukturim të orarit, që orët e detyrueshme të përfundojnë në 12:00.
PRISHTINË — Mësimi tërëditor pritet të zgjerohet nga shtatori edhe në tri ose katër shkolla të tjera të Prishtinës, pas 12 shkollave ku aktualisht zbatohet nga klasa e parë deri në të pestën.
Drejtori i Arsimit në Komunën e Prishtinës, Arianit Elshani, konfirmoi zgjerimin në tri ose katër shkolla të tjera, por theksoi edhe sfidat në ato ekzistuese: hapësirat e ngrënies, aspektin higjienik dhe kurrikulën. Orari i zgjatur, tha ai, ka qenë barrë për mësimdhënësit, pasi pagesat nuk kanë reflektuar në raport me punën dhe angazhimin.
Në SHFMU "Nazim Gafurri", një nga pesë shkollat ku nisi zbatimi, janë të përfshirë rreth 600 nxënës në 20 klasa. Drejtoresha Ardianë Makolli-Sadiku tha se shqetësimi i prindërve që nga fillimi ka qenë se qëndrimi i gjatë në bankë dhe në karrige mund të ndikojë negativisht.
Sipas saj, janë krijuar kënde relaksi brenda dhe jashtë klasave, por duhen më shumë, si edhe materiale të përshtatshme për procesin. Ajo kërkoi edhe angazhimin e Ministrisë së Arsimit për një kurrikulë të veçantë për mësimin tërëditor.
Këshilli i Prindërve kërkoi ndryshim të modelit të organizimit. Nënkryetarja Mejreme Ymeri, prind i tre fëmijëve në tri nivele të arsimit parauniversitar, tha se një pjesë e objektivave të prezantuara në fillim nuk është arritur dhe se mësimi, në shumë raste, ka sjellë sfida shtesë edhe për prindërit, edhe për fëmijët.
Për t'i tejkaluar sfidat, duke përfshirë edhe ushqimin, Këshilli i ka propozuar Drejtorisë së Arsimit një zgjidhje kalimtare: riorganizimin e procesit, që orët e detyrueshme të përfundojnë deri në orën 12:00. Mësimi tërëditor fillon në 8:00 të mëngjesit dhe përfundon në 15:30.
Burim: Koha.net
— Redaksia ZHURMA