Memeti: Koalicioni Shqiptar mund të hyjë në qeverinë e re në Serbi

Koalicioni Shqiptar ka fituar dy vende në Parlamentin e Serbisë, të cilat do t'i mbajnë Shaip Kamberi dhe Visar Memeti. Në emisionin «Këndi i Debatit» në Tëvë1, Memeti deklaroi se ky grupim mund të bëhet pjesë e kabinetit të ri qeveritar nëse arrin dakordim me platformën e Listës Studentore, e cila doli e para në zgjedhjet e fundit.

Sipas përfaqësuesit të sapozgjedhur, synimi fillestar i marrëveshjes së koalicionit ishte fitimi i tri ulëseve në kuvend, mirëpo dalja e lartë e votuesve në zgjedhje ndikoi në rezultatin përfundimtar prej dy mandatesh. Ai e cilësoi këtë arritje si të kënaqshme në kushtet e krijuara politike.

Bashkëpunimi i mundshëm me fituesit e zgjedhjeve varet nga qëndrimi që Lista Studentore do të mbajë ndaj pakicës shqiptare. Memeti bëri me dije se programi dhe orientimi i këtij grupimi kanë ende paqartësi, prandaj nevojitet kohë që ata të sqarojnë pozicionin e tyre ndaj kërkesave kryesore të shqiptarëve.

Kërkesat themelore që Koalicioni Shqiptar kërkon të zgjidhen përfshijnë ndalimin e pasivizimit të adresave në Luginën e Preshevës, zbatimin e marrëveshjes për njohjen e diplomave të fituara në Kosovë, si dhe punësimin e kuadrove shqiptare në institucionet publike lokale.

Çdo bisedim për hyrje në qeveri do të kushtëzohet nga përfshirja e këtyre pikave në marrëveshjen e ardhshme politike, në mënyrë që përfaqësimi parlamentar të sjellë zgjidhje konkrete për banorët e Luginës.

«Nëse gjejmë një gjuhë të përbashkët apo biem në dakordim me platformën që e kemi ne si Koalicion Shqiptar, pse jo të mos jemi pjesë e kësaj qeverie», ka thënë Memeti.

Ai ka shtuar se «një çështje pak më kryesore është pasivizimi i adresave, një temë e cila ndër vite ka bërë bujë. Çështje tjetër është edhe mosnjohja e diplomave, edhe pse ka një marrëveshje mes Kosovës dhe Serbisë, mirëpo edhe sot kjo nuk është implementuar. Çështje tjetër që nuk kërkon shumë kohë është inkuadrimi i kuadrove shqiptare në institucionet publike këtu në Luginën e Preshevës».