Kurti takon përfaqësuesit e listës «Koalicioni Shqiptar»

Kryeministri i vendit, Albin Kurti, ka pritur në Zyrën e Kryeministrit drejtues, përfaqësues të subjekteve politike, aktivistë dhe bashkëkombës nga Lugina e Preshevës dhe Pazari i Ri, të cilët u bënë bashkë në listën e përbashkët. Përmes një postimi në rrjetin social Facebook, kryeministri theksoi se ky bashkim solli rezultatin më të mirë të shqiptarëve në Serbi që nga viti 2000, duke siguruar 1.233 vota më shumë krahasuar me vitin 2020 kur ishin fituar tri mandate.

Gjatë takimit u vlerësua se ky rezultat përfshin fitimin e dy mandateve dhe kalon përmasat e thjeshta numerike, duke u arritur në rrethana sfiduese që përfshijnë pasivizimin e adresave, mosnjohjen e diplomave, përjashtimin nga institucionet publike, diskriminimin ekonomik, si dhe zbrazjen e vendbanimeve shqiptare. Kreu i ekzekutivit theksoi se shqiptarët janë renditur të dytët për nga votat dhe të parët për nga mandatet ndër listat e pakicave kombëtare në Serbi.

«Bashkimi nuk duhet të përfundojë», u shpreh ai, duke shtuar se ky kapitull i ri kërkon mbrojtje të fuqishme të të drejtave, kërkesë për barazi dhe përpjekje për jetë dinjitoze në vendlindje, pasi mandatet përbëjnë njëherësh edhe përgjegjësi të përbashkët.