Mbi 1.400 shkelje në Rajonin Jugperëndimor për dhjetë ditë

Sistemi i Qytetit të Sigurt, i cili hyri në fuqi më 12 tetor në Ohër, Strugë, Dibër dhe Kërçovë, ka regjistruar një numër të madh dënimesh gjatë dhjetë ditëve të para. Sipas zëdhënësit të SPB-Ohër, Stefan Dimovski, në të gjithë rajonin që mbulohet nga ky institucion u shënuan gjithsej 1415 shkelje, ku 85% e gjobave takojnë tejkalimit të shpejtësisë së lejuar me 1211 raste të regjistruara.

Dimovski vlerëson se ky mekanizëm ndihmon në parandalimin e aksidenteve dhe në zvogëlimin e numrit të tyre, sidomos atyre me pasoja fatale dhe lëndime të rënda. Ndërkohë, banorët e rajonit shprehin qëndrime të ndara lidhur me efektin e masave të reja, ku disa vërejnë se drejtuesit e mjeteve kanë treguar më shumë kujdes, kurse të tjerë konsiderojnë se ndikimi ende nuk është vënë re plotësisht pasi qytetarët po përshtaten me këtë formë gjobitjeje.