Maran: Synojmë vendin e parë në grup dhe promovimin në Ligën B

Selektori i Kombëtares së Shqipërisë, Rolando Maran, ka publikuar listën e lojtarëve për dy ndeshjet e fundit në kuadër të Grupit C1 të Ligës së Kombeve, ku kuqezinjtë do të përballet me Finlandën dhe Bjellorusinë. Ndeshja e parë do të luhet në Tiranë kundër Finlandës më 12 nëntor, në orën 20:45, kurse tri ditë më vonë Shqipëria do të ndeshet me Bjellorusinë në Budapest të Hungarisë. Grumbullimi zyrtar i Kombëtares nis të hënën, ndërsa stërvitja e parë do të mbahet me dyer të hapura për të gjithë tifozët.

Shqipëria kryeson aktualisht Grupin C1 me nëntë pikë, e ndjekur nga Finlanda dhe Bjellorusia me nga shtatë pikë secila. Maran ka thënë se synon që sezonin ta mbyllë në këtë pozitë për t’u promovuar në Ligën B sezonin tjetër. «Presioni është pozitiv, duam të bëjmë mirë, të mbyllim mirë këtë grup, në kryesim. Kemi të gjitha mundësitë ta bëjmë, jemi me motivimin e duhur», është shprehur ai, duke shtuar se skuadra e tij është e para në Ligën C për gola në favor, me më pak aksione kundër dhe me numrin më të lartë të gjuajtjeve në portë.

Në këtë listë nuk do të jenë mbrojtësi Ivan Balliu, për shkak të një dëmtimi të mëparshëm, si dhe portieri Thomas Strakosha, i cili është i fokusuar te rikuperimi. Ndërkohë, një nga risitë është Ysni Ismaili, futbollisti i Dinamos, i cili merr ftesë për herë të parë. Maran u shpreh se përzgjedhja është bazuar te forma aktuale dhe minutazhi i lojtarëve, ndërsa theksoi se lojtarët që zgjedhin fanellën kuqezi e bëjnë këtë me krenari.