LSDM: Rritja e kostos dhe çmimeve me pakicë thellon krizën ekonomike

Enti Shtetëror i Statistikave ka regjistruar një rritje të kostos së jetesës në muajin tetor të këtij viti, krahasuar me të njëjtin muaj të vitit të kaluar, prej 3.3 për qind, ndërsa çmimet me pakicë janë rritur me 3.2 për qind. Sipas të dhënave statistikore dhe kumtesës së LSDM-së, kjo situatë vjen në një kohë kur standardi i jetesës së qytetarëve po përkeqësohet vazhdimisht.

LSDM thotë se shporta e konsumatorit në tetor ka tejkaluar shifrën prej 70.000 denarësh, ndërsa me qira ajo ka arritur në rreth 90.000 denarë, kurse paga minimale mbetet në 26.000 denarë. Sipas opozitës, nga një total prej 540.000 punonjësish, rreth 180.000 punëtorë marrin paga më pak se 31.200 denarë në muaj, ndërsa kreu i qeverisë ka refuzuar rritjen e pagës minimale në 600 euro. Partia opozitare thekson gjithashtu se buxheti është futur në kolaps me një vrimë prej rreth 900 milionë eurosh dhe se po grumbullohen borxhe të reja të shtrenjta.