Lipa: Në vitin 1992 unë dhe gruaja ime ishim të bllokuar në Sarajevë

Babai dhe njëherësh menaxheri i Dua Lipës, Dukagjin Lipa, ka deklaruar se në vitin 1992 ai dhe gruaja e tij Anesa ishin të bllokuar në Sarajevën e kohës së luftës. Gjatë një interviste për televizionin kroat RTL Direkt, pas një konference në Zagreb të enjten, ai tregoi se u largua nga Kosova për shkak të problemeve politike për të vendosur jetën në Londër.

Siç raportoi Zhurma më 8 nëntor 2026, themeluesi i festivalit Sunny Hill, të cilin e nisi në Prishtinë, ishte ftuar si folës kryesor në ngjarjen më të madhe rajonale të industrisë së eventeve CROWD & LOUD në Zagreb.

Gjatë fjalës së tij për mediat, Lipa tregoi se Londra e tërhoqi si një qytet i muzikës dhe artit, ndonëse nuk ishte destinacion i zakonshëm për emigrantët në atë periudhë. Ai shtoi se familja ka një shtëpi verore në Ulqin dhe këtë verë ndoqi koncertin e Dino Merlin, me të cilin ka njohje. Në lidhje me marrëdhënien me të bijën, Lipa shpjegoi se bashkëpunojnë që nga fëmijëria e saj dhe se vendimet e rëndësishme merren gjithmonë së bashku, duke nëvizuar se në çështjet krijuese fjala e fundit i takon gjithmonë Duas. Po ashtu, ai njoftoi se të tre fëmijët e tij flasin rrjedhshëm gjuhën shqipe, ndërsa vetë flet edhe kroatisht me theks boshnjak.

«Nuk e di nëse e dini, por gjatë studimeve të mia kalova shumë kohë në Sarajevë. Dino Merlin është një interpretues dhe artist i shkëlqyer. Ne ishin në Mal të Zi atëherë. Kemi një shtëpi verore në Ulqin, në jug të vendit. Rastësisht ishim atje dhe për fat të mirë e njohim ekipin, kështu që një telefonatë ishte e mjaftueshme», tha ai.

Lipa shtoi gjithashtu mendimin e tij se artistët dhe sportistët mund të bëjnë më shumë për vendin se politikanët: «Për fat të mirë, sot mund ta promovojmë vendin tonë ashtu siç e meriton dhe ta sjellim më afër njerëzve sesa kur u larguam».