Abas Fejzullahu përmbyll hartimin e librit për solidaritetin e viteve '90

Mësuesi veteran dhe ish-i burgosuri politik Abas Fejzullahu ka përgatitur librin e titulluar «Familja ndihmon familjen», përmes të cilit synon të dokumentojë kontributin e mbi tetë mijë familjeve nga Kosova dhe trojet e tjera shqiptare. Nisma për këtë aksion kishte filluar në Prizren për t'u dalë në ndihmë familjeve të minatorëve të Stantërgut, Kishnicës dhe Goleshit, të cilët ishin futur në grevë urie kundër heqjes së autonomisë së Kosovës. Solidariteti u përhap shpejt në mbarë vendin përmes degëve dhe nëndegëve të krijuara, ku u angazhuan edhe studentë të Universitetit të Prishtinës.

Organizatorët u ballafaquan me pengesa të mëdha nga autoritetet serbe, të cilat konfiskonin kamionët me ndihma ushqimore dhe higjienike, si dhe burgosnin shoferët e veprimtarët. Për të shmangur rreziqet, u vendos që familjet në nevojë të mbështeteshin me nga 150 marka gjermane në muaj si pikë orientimi, ndërsa kontributet e donatorëve i kalonin shpesh herë edhe dyfishin e kësaj shume. Në këtë nismë kontribuuan gjithashtu shqiptarët e Maqedonisë së Veriut dhe të Kosovës Lindore, duke dëshmuar bashkëpunim të ngushtë ndërmjet trevave.

Aksioni që nga ditët e para mori mbështetjen e fuqishme të veprimtarit Adem Demaçi, i cili u dërgoi një letër nismëtarëve duke i përgëzuar dhe premtuar përkrahje të parezervë. Për realizimin e monografisë, Fejzullahu ka përgatitur formularë të posaçëm për të mbledhur dëshmi nga dhuruesit dhe përfituesit e ndihmave, ndërsa theksohet nevoja që Qeveria e Kosovës dhe institucionet të mbështesin botimin e këtij libri dëshmie për qëndresën e popullit.