Hekrem Maliqi udhëheq Alb'swiss TV pas dekadash angazhimi në Zvicër

Hekrem Maliqi vazhdon drejtimin e platformës televizive Alb'swiss TV në Gjenevë të Zvicrës, një projekt mediatik i themeluar në kuadër të Shoqatës Kulturore Shqiptare «Iliria». Ai udhëheq këtë medium me bashkëpunimin e kryeredaktorit Avni Azizi, duke krijuar një urë komunikimi dhe informimi për komunitetin e mërgatës shqiptare në Zvicër.

Aktiviteti publik i Hekrem Maliqit ka nisur gjatë periudhës 1991–1998, kur ai ka punuar si bashkëpunëtor i rregullt i Qendrës për Informim të Kosovës me seli në Gjenevë. Gjatë asaj kohe, ai ka kryer detyra si informaticien, bashkëadministrator i rrjetit kompjuterik, kameraman dhe fotograf i aktiviteve të organizuara nga mërgata shqiptare. Më pas, gjatë luftës së viteve 1998–1999, ai ka raportuar drejtpërdrejt nga terreni dhe kampet e refugjatëve në Stankovec, Çegran dhe Bllacë. Pas përfundimit të konfliktit, në bashkëpunim me KFOR-in Amerikan, ai ka dokumentuar me fotografi dhe pamje filmike ngjarjet në të gjithë territorin e Kosovës. Materialet e përgatitura prej tij transmetoheshin çdo ditë drejt Gjenevës dhe publikoheshin përmes agjencisë së lajmeve Kosova Info si dhe platformës Trepça.net, e cila drejtohej nga veprimtari Lutfi Kelmendi.

Në rrafshin arsimor dhe shoqëror, Maliqi ka shërbyer gjatë viteve 1996–2001 si mësimdhënës i lëndës së Informatikës dhe anëtar i Kryesisë në Universitetin Popullor Shqiptar në Gjenevë. Ky institucion arsimor ishte themeluar nga Ueli Leuenberger, i cili ka mbajtur funksionin e këshilltarit nacional në Zvicër. Përmes këtij angazhimi dhe në kuadër të projekteve të Organizatës Zvicerane për Refugjatë, Maliqi ka organizuar kurse kompjuterike me qëllim aftësimin profesional dhe lehtësimin e integrimit të refugjatëve në shoqërinë zvicerane.

Krijimi i televizionit Alb'swiss TV lindi në vitin 2016 si rrjedhojë e vështirësive për transmetimin e një aktiviteti humanitar në Gjenevë. Me mbështetjen e shoqatës «Iliria» dhe investimeve vetanake, mediumi nisi funksionimin për t'i dhënë hapësirë iniciativave kulturore. Që nga viti 2017, ky televizion ka dokumentuar manifestime të ndryshme artistike, shoqërore dhe kombëtare, duke pasqyruar jetën e diasporës dhe duke ndihmuar në ruajtjen e gjuhës shqipe te brezat e rinj.

Ministri Xhafer Shatri e ka cilësuar Hekrem Maliqin si një bashkëpunëtor të palodhur, atdhetar dhe të besueshëm për kontributin e tij vullnetar në mbështetje të çështjes së Kosovës.