Shqipëria i shpall 'non grata' Valon Belën e Bekir Halimin për 10 vjet
Vendimi u mor më 17 korrik dhe hyrja në Shqipëri u ndalohet të dy shtetasve nga Maqedonia e Veriut.
TIRANË — Shqipëria i ka shpallur persona të padëshiruar për 10 vjet dy shtetasve nga Maqedonia e Veriut, Valon Belës dhe Bekir Halimit, duke u ndaluar hyrjen në vend. Lajmin e bëri të ditur ministri i Brendshëm, Besfort Lamallari, në ABC News.
Vendimi është marrë më 17 korrik, në funksion të mbrojtjes së interesit kombëtar, pasi të dy përbëjnë rrezik për sigurinë kombëtare, tha Lamallari. Sipas tij, u administruan të gjitha informacionet e nevojshme nga agjencitë ligjzbatuese.
“Sa më shumë i afrohemi familjes europiane duhet të sillemi si vend anëtar, duke marrë çdo masë të nevojshme jo vetëm për të garantuar sigurinë kombëtare, por edhe për të mos lejuar asnjë lloj interference të agjendave të dëmshme për Shqipërinë, rajonin e më gjerë”, tha Lamallari.
Vetë Belës e ka kritikuar vendimin. “Vendimin kur e ka marrë paska qenë prezent edhe njësia antiterror — paramendoni antiterror i kujt çfarë porosi merr ai, nga Vuçiq”, tha ai, duke theksuar se mban 22 mirënjohje nga njësia speciale amerikane. Edhe Halimi e cilësoi padrejtësi: “Do të vazhdojmë të kërkojmë drejtësi dhe të luftojmë padrejtësitë kudo që bëhen”.
Halimi është hoxhë nga Shkupi, ndërsa Bela ka qenë aktiv në politikë dhe ka mbështetur protestat e “Revolucionit Flamingo”. Në qershor, Shqipëria i ndaloi për 15 vjet hyrjen predikueses nga Kosova, Ikballe Huduti.
Burim: Portalb
— Redaksia ZHURMA
