Alarmi i BE: Qeveritarët e korruptuar po ruajnë pasurinë

Progres-Raporti i Komisionit Evropian ka sjellë shifra të reja mbi luftën kundër korrupsionit, duke vënë në dukje kontrastin mes dosjeve të hetuara dhe pasurive reale të sekuestruara nga zyrtarët e lartë shtetërorë. Gjatë vitit 2025, vlera totale e pasurive të sekuestruara dhe konfiskuara nga Struktura e Posaçme Antikorrupsion arriti në 45.4 milionë euro, por vetëm 1.2 milionë euro prej tyre vinin nga procedimet për korrupsion të nivelit të lartë.

Raporti vëren se konfiskimet reale të lidhura me pushtetarët u limituan në rreth 100,000 euro, ndërsa vendimet për konfiskime pasurie ranë nga 20 në vetëm 8 gjatë periudhës së fundit. Brukseli ka veçuar gjithashtu tre fusha kryesore ku janë përqendruar hetimet për korrupsion të nivelit të lartë, të cilat përfshijnë shëndetësinë, teknologjinë e informacionit dhe komunikimit, si dhe tenderat e infrastrukturës.