Vrasja në Bulqizë: Bashkëshortja dhe djali dyshohet se fshehën gjurmët
Detaje të reja nga vrasja e Urim Fikut në fshatin Godvi, ku familjarët dyshohet se e paraqitën ngjarjen fillimisht si sulm nga një ari.
Redaksia ZHURMA · · 2 min lexim
Një ngjarje e rëndë ka ndodhur në fshatin Godvi të Bulqizës, ku 61-vjeçari Urim Fiku u vra në orët e para të mëngjesit. Sipas hetimeve, ai u qëllua fillimisht me pistoletë pas shpine dhe pësoi gjithashtu një dëmtim të rëndë në kokë me sëpatë. Për të fshehur krimin, bashkëshortja Sadete Fiku dhe djali i tij e dërguan trupin në spital duke pretenduar se ishte sulmuar nga një ari, ndërsa mjekët konstatuan se ai kishte mbërritur pa shenja jete.
Pas ngjarjes, nënë e bir ndërmorën veprime për të zhdukur provat. Sadete Fiku tha se motivi lidhej me xhelozinë për shkak të një lidhjeje jashtëmartesore të bashkëshortit. Për të fshehur plagën e armës, ata i hoqën rrobat viktimës dhe e veshën me të tjera. Djali i preu rrobat me gërshërë dhe i hodhi në tualetin e banesës, por ato u gjetën dhe u sekuestruan nga policia.
Autoritetet arrestuan bashkëshorten dhe djalin e viktimës, mbi të cilët rëndojnë dyshimet për veprat penale të vrasjes për shkak të marrëdhënieve familjare në bashkëpunim dhe mbajtjes pa leje të armëve të zjarrit e municionit. Pistoleta e përdorur në krim u gjet pasi u tregua vendndodhja nga djali.
