Kuvendi transkripton seancat me inteligjencë artificiale — 287 mbledhje të përpunuara

TIRANË — Kuvendi i Shqipërisë transkripton tashmë automatikisht seancat plenare, në kohë reale, me anë të inteligjencës artificiale. Kryetari i Kuvendit, Niko Peleshi, e bëri të ditur këtë zhvillim teknologjik në mbledhjen e grupit parlamentar të Partisë Socialiste, ku bëri një bilanc të punës parlamentare gjatë dy sesioneve të para të kësaj legjislature, duke theksuar synimin për më shumë transparencë dhe akses të publikut në veprimtarinë e Kuvendit.

Sipas Peleshit, sistemi ka hyrë në funksion prej disa muajsh dhe po vazhdon trajnimin e vetëpërmirësimin. Që nga mbledhja e parë e transkriptuar janë përpunuar me sukses 287 mbledhje të komisioneve parlamentare, me rreth 486 orë material. Të gjitha seancat plenare transmetohen tani drejtpërdrejt me titra në kanalin e Kuvendit në YouTube.

Sistemi bazohet në një model inteligjence artificiale të trajnuar posaçërisht mbi gjuhën shqipe dhe terminologjinë parlamentare, çka i mundëson të njohë me saktësi të lartë emrat, institucionet dhe fjalorin specifik të Kuvendit.

Peleshi nënvizoi se sistemi funksionon brenda infrastrukturës së Kuvendit, pa u mbështetur te shërbime të jashtme, duke garantuar sigurinë dhe sovranitetin e të dhënave. Përveç transkriptimit, ai ofron identifikimin automatik të folësve dhe një mjedis bashkëpunues online, ku personeli i Kuvendit mund të rishikojë tekstin me shpejtësi, duke shkurtuar kohën e publikimit të procesverbaleve zyrtare.

Titrat në kohë reale e bëjnë veprimtarinë e Kuvendit më të aksesueshme, përfshirë për personat me vështirësi në dëgjim, ndërsa çdo seancë ruhet në një arkiv dixhital të kërkueshëm. Me këtë nismë, Kuvendi renditet ndër parlamentet e para në rajon që përdorin inteligjencën artificiale për transkriptim.

Burim: ATSH
— Redaksia ZHURMA