Paja: Elton Tozaj më ka përndjekur dhe fyer në rrjetet sociale

Aktori i njohur i humorit Gazmend Paja ka depozituar një kallëzim penal në Prokurorinë e Tiranës ndaj Elton Tozajt, duke e akuzuar publikisht për përndjekje, shpifje dhe fyerje përmes platformave digjitale. Sipas dokumentit të dorëzuar në organin e akuzës, padia ndaj Tozajt vjen pas publikimit të videove në rrjetet sociale si TikTok dhe YouTube, ku përmendet emri i aktorit dhe i atribuohen fakte e sjellje të pavërteta.

Kjo padi përbën një tjetër zhvillim të ngjashëm publik lidhur me përmbajtjet e shpërndara në internet, pasi më herët është bërë publike edhe një tjetër padi ndaj të njëjtit person nga zëvendësministri i Infrastrukturës dhe Energjisë, Erlind Sulo, po me akuzën e shpifjes. Prej kohësh, në rrjete sociale si TikTok dhe Instagram, krijohen përmbajtje ku aludohet për jetën e personazheve të njohura nga arti dhe politika.

Në kallëzimin e dorëzuar nga aktori theksohet se përdorimi i shprehjeve nënçmuese dëmton rëndë figurën publike dhe profesionale. Sipas padisë së siguruar, Paja pretendon se «i akuzuari, shtetasi Elton Tozaj, në cilësinë e njeriut të showbizit dhe krijuesit të përmbajtjes në rrjetet sociale, ka publikuar video në platforma të ndryshme (TikTok dhe YouTube), në të cilat përmend emrin e viktimës akuzuese dhe i atribuon atij fakte e sjellje të pavërteta, si dhe përdor shprehje nënçmuese, duke cenuar rëndë nderin, dinjitetin dhe figurën e tij publike e profesionale».

Aktori i njohur kërkon ndërhyrjen e institucioneve të drejtësisë për të mbrojtur imazhin e tij nga akuzat dhe aludimet që qarkullojnë në internet, të cilat sipas tij nuk kanë asnjë lidhje me të vërtetën dhe cënojnë integritetin e tij personal e profesional.