UEFA kërkon llogari nga FIFA për drejtimin e Infantinos
Institucioni evropian i futbollit i ka dërguar një listë me 42 pyetje FIFA-s, duke vendosur si afat datën 2 nëntor për përgjigje.
Redaksia ZHURMA · · 1 min lexim
Përplasja mes UEFA-s dhe FIFA-s ka marrë përmasa të mëdha, pasi organizata evropiane i ka kërkuar sqarime presidencës së Gianni Infantinos mbi transparencën financiare dhe vendimmarrjen. Në qendër të polemikave qëndron një projekt investimi prej 4.2 miliardë dollarësh, i njohur si FIFA Forward Enterprise, i cili parashikonte përfshirjen e investitorëve privatë në të drejtat komerciale përmes një marrëveshjeje me Thrive Capital që më pas u tërhoq.
Lista prej 42 pyetjesh përfshin çështje të ndjeshme si shpërblimi personal i Infantinos, pagesat ndaj këngëtarit Marc Anthony, udhëtimet private dhe vendimet disiplinore, përfshirë rastin e futbollistit Folarin Balogun. Sekretari i përgjithshëm i UEFA-s, Theodore Theodoridis, theksoi se shpjegimet e deritanishme nuk i kanë adresuar shqetësimet kryesore, ndërsa FIFA është shprehur se synon të përgjigjet pa shkelur konfidencialitetin.
