Kush janë fytyrat e reja që po hyjnë në Kuvendin e Kosovës?
Numërimi i votave me postë po zbardh emrat e deputetëve të rinj, ku LVV-ja po prin me emra si Osman Musliu e Jakup Nura.
PRISHTINË — Numërimi i votave nga mërgata në Qendrën e Numërimit dhe Rezultateve po qartëson përbërjen e legjislaturës së re të Kuvendit të Kosovës. Deri mesditën e së dielës janë numëruar 39 kuti votimi, ndërsa kanë mbetur edhe rreth 150 të tjera. Shumica e deputetëve të rinj pritet të vijnë nga lista e Lëvizjes Vetëvendosje.
Nga radhët e LVV-së, ish-imami i Drenasit, Osman Musliu, ka siguruar mandatin me rreth 30 mijë vota. Arton Konushevci, vëllai i dëshmorit Ilir Konushevci, pritet po ashtu të jetë deputet me mbi 27 mijë vota. Këtij grupi pritet t'i bashkohen edhe aktori Armend Baloku, aktivistja Krenare Çerkini dhe Valon Peci.
Ndërkaq, ish-luftëtari i UÇK-së Jakup Nura rikthehet në Kuvend me mbi 21 mijë vota, pas një mandati disamujor që ushtroi në vitin 2025. Ndryshime ka edhe në kampet e tjera. Në Lidhjen Demokratike të Kosovës po rikthehet Paris Guri, i cili po ashtu kishte shërbyer për një kohë të shkurtër në vitin 2025.
Në Aleancën për Ardhmërinë e Kosovës priten kthime pasi Ardian Gjini dhe Daut Haradinaj njoftuan se do të heqin dorë nga mandatet e tyre. Ndërkohë, ministra, ish-kryetarë komunash dhe figura të njohura politike kanë mbetur jashtë parlamentit. Këto lëvizje tregojnë se votat e fundit po ripërcaktojnë fituesit brenda partive.
Burim: Telegrafi
— Redaksia ZHURMA