Kurti thotë se Kosova dëshiron të kontribuojë për një Evropë më të sigurt

Kryeministri i Republikës së Kosovës, Albin Kurti, deklaroi se vendi ynë synon të japë kontributin e vet në një Evropë më të bashkuar dhe më të sigurt, gjatë një adresimi të mbajtur në Institutin për Çështje Ndërkombëtare dhe Evropiane në Dublin, ku u prit fillimisht nga drejtori i përgjithshëm Mark Redmond. Rrugëtimi i shtetit tonë drejt integrimit evropian ishte tema qendrore e këtij diskutimi.

Kryeministri Kurti sqaroi se javën e kishte filluar në Francë, duke marrë pjesë në Forumin e Paqes në Paris me fokus te rindërtimi i shoqërive pas luftës, ndërsa vizitën e përmbylli në Dublin në Samitin e Komunitetit Politik Evropian. Ai vuri në dukje se Kosova dhe Irlanda ndajnë vlerësimin e lartë për identitetin kombëtar, vetëvendosjen dhe bindjen se pavarësia e një shteti dhe integrimi evropian përforcojnë njëri-tjetrin.

Sipas shefit të ekzekutivit, në vitin 1928 Gonxhe Bojaxhiu, e lindur nga prindër shqiptarë me prejardhje nga Prizreni dhe Gjakova, kishte udhëtuar në moshën 18-vjeçare drejt Dublinit për t'iu bashkuar Motrave të Loretos në Loreto Abbey në Rathfarnham. Kurti kujtoi se Nënë Tereza mbetet simbol i traditës katolike ndër shqiptarët dhe se mijëra pelegrinë vizitojnë çdo vit fshatin Letnicë në juglindje të vendit, ku ajo ndjeu thirrjen për t'i shërbyer njerëzimit.

Duke folur për zhvillimet ndërkombëtare, Kurti theksoi se është i kënaqur që vizitojë Irlandën në kohën e Presidencës së këtij shteti në Këshillin e Bashkimit Evropian, duke besuar se momentumi i ri i zgjerimit do të sjellë përparim konkret. Ai përsëriti se përfundimi i një lufte përfaqëson vetëm hapin e parë, ndërsa sigurimi i paqes kërkon përpjekje të pandërprera nga qytetarët dhe institucionet.

«Ne jemi vend evropian. Kushtetuta jonë është e re, por populli ynë, gjuha jonë, disa nga traditat dhe kultura jonë janë të lashta», u shpreh Kurti gjatë fjalimit të tij. Ai shtoi se sakrificat e shumta të brezave, dekadat e represionit dhe diskriminimit të ngjashëm me aparteidin ndaj shqiptarëve kulmuan me protestat paqësore dhe luftën çlirimtare, të ndjekura nga ndërhyrja e NATO-s në vitin 1999 për të ndalur gjenocidin e katërt të Serbisë ndaj shqiptarëve që nga fundi i shekullit të nëntëmbëdhjetë.

Kryeministri shprehu mirënjohje të thellë për Irlandën për njohjen e pavarësisë në vitin 2008, muajin kur ajo u shpall zyrtarisht. Ai rikujtoi se Kosova kaloi përmes periudhës së pavarësisë së mbikëqyrur nga viti 2008 deri në vitin 2012, ndërsa në vitin 2010 Gjykata Ndërkombëtare e Drejtësisë konfirmoi se shpallja e pavarësisë nuk shkeli të drejtën ndërkombëtare.