Stojkoviq: Radoiçiqi dhe Veselinoviqi ndodhen në Rusi

Avokati nga Beogradi, Çedomir Stojkoviq, ka deklaruar se Milan Radoiçiqi dhe Zvonko Veselinoviqi janë larguar nga Serbia dhe ndodhen në Rusi. Sipas tij, Veselinoviqi dyshohet se ka udhëtuar drejt Rusisë përmes Turqisë, ndërsa Radoiçiqi aktualisht ndodhet në Moskë. Stojkoviq vlerësoi se largimi i tyre është pasojë e bashkëpunimit të shërbimeve të inteligjencës serbe dhe ruse, duke pretenduar se ata po kërkojnë mbrojtje pasi pushteti i ri në Serbi nuk do t'i mbrojë më.

Duke komentuar përgjegjësinë e institucioneve serbe, avokati përmendi gjithashtu rastin e dy shtetasve kinezë, për të cilët tha se Prokuroria e Lartë në Beograd kishte ndihmuar largimin e tyre nga Serbia pavarësisht urdhër-arresteve amerikane. Sa i përket Radoiçiqit, i cili përballet me akuza për sulmin e armatosur në Banjskë, ai tha se largimi nuk do të ishte i mundur pa veprimin e shërbimeve sekrete serbe.

Stojkoviq foli edhe për zhvillimet politike në Serbi pas ngritjes së Listës Studentore, duke thënë se pret një qasje tjetër të Beogradit ndaj Kosovës, por përjashtoi mundësinë e njohjes së pavarësisë. Ai u shpreh se pret ndryshime në aspektin e sigurisë dhe marrëdhënie më miqësore me vendet fqinje, pa përdorur mjete ushtarake apo paramilitare.