Limaj kërkon unitet kombëtar për mbrojtjen e luftës çlirimtare

Kryetari i Nismës Socialdemokrate, Fatmir Limaj, ka marrë pjesë në një diskutim në Universitetin AAB ku ka folur para studentëve dhe stafit akademik rreth procesit gjyqësor në Hagë. Përmes një postimi në rrjetin social Facebook dhe gjatë bashkëbisedimit, ai ka deklaruar se Kosova pas 16 shtatorit nuk është më e njëjta dhe se kjo çështje ndikon në ndërtimin e së ardhmes së vendit.

Sipas Limajt, procesi në Hagë nuk i ka përmbushur standardet e një drejtësie të mirëfilltë për shkak të mungesës së transparencës, pikëpyetjeve mbi kredibilitetin e trupit gjykues, kontestimeve për provat dhe çështjeve procedurale të të akuzuarve. Ai ka kërkuar që vendi ta vërë në funksion ligjin për këtë proces dhe mbrojtjen e të drejtave të të akuzuarve, duke shtuar se kjo betejë kërkon argumente juridike, dokumente dhe komunikim me aleatët strategjikë.

Gjatë diskutimit, Limaj ka prezantuar shifra për dënimet e krimeve të luftës, duke përmendur se për krimet e kryera nga Serbia janë shqiptuar 106 vjet burgim, ndërsa ndaj pjesëtarëve të Ushtrisë Çlirimtare të Kosovës 567 vjet burgim. Ai ka përmendur gjithashtu masakrat në Qirez, Poklek dhe Abri, për të cilat thotë se ende kërkohet drejtësi, ndërsa ka theksuar nevojën për unitet kombëtar për mbrojtjen e historisë. «Sepse mbrojtja e së vërtetës sonë historike është njëkohësisht mbrojtje e dinjitetit të luftës çlirimtare dhe e vetë shtetësisë së Kosovës», ka shkruar Limaj.