Kurti ngre te Plenkoviçi pabarazinë e vendimit të Speciales

Kryeministri i Kosovës, Albin Kurti, në takim me homologun kroat, Andrej Plenković, ngriti çështjen e vendimit të Dhomave të Specializuara, duke vënë në dukje pabarazinë e padrejtë në ndarjen e përgjegjësisë për luftën. Takimi u zhvillua në margjinat e Asamblesë së Përgjithshme të OKB-së, ku u diskutuan marrëdhëniet dypalëshe, zhvillimet rajonale, bashkëpunimi në siguri e mbrojtje, integrimi evropian dhe euroatlantik i Kosovës, si dhe zhvillimi ekonomik.

Kurti përmendi edhe personat e zhdukur, varrezat masive të zbuluara së fundmi në Kosovë dhe pengesat nga mos-hapja e arkivave serbe. Ai vlerësoi bashkëpunimin me Kroacinë në fushën e mbrojtjes dhe ushtarake, si dhe mbështetjen e Zagrebit për anëtarësimin e Kosovës në BE, Këshillin e Evropës dhe avancimin në strukturat euroatlantike. U përmend edhe diskriminimi administrativ ndaj shqiptarëve në Luginën e Preshevës.

Kryeministri kosovar përshëndeti bashkëpunimin ndërmjet ministrive të drejtësisë së dy vendeve për rastin e Bajram Bajramit, i cili ishte ndaluar padrejtësisht në Kroaci dhe u lirua. Në takim u shkëmbyen qëndrime mbi sfidat e sigurisë në rajon, ndikimin e Rusisë dhe domosdoshmërinë e forcimit të bashkëpunimit mes vendeve dhe partnerëve.