Ku fshihej 'fabrika' teknologjike e kanabisit e gjashtë shqiptarëve në Spanjë?

MUNERA — Autoritetet spanjolle kanë shkatërruar një plantacion të brendshëm kanabisi të pajisur me teknologji të avancuar në provincën e Albasetes. Gjatë këtij operacioni të koduar "Canli", Garda Civile arrestoi gjashtë shtetas shqiptarë të moshës nga 25 deri në 45 vjeç, të cilët akuzohen për kultivim të drogës, vjedhje të energjisë dhe pjesëmarrje në grup kriminal.

Hetimet nisën pas dyshimeve për aktivitete të pazakonta në një pronë në komunën Munera, ku hetuesit identifikuan të dyshuarit që lëviznin rregullisht. Grupi kishte organizuar roje 24-orëshe për të mbikëqyrur zonën. Pas kontrollit, policia sekuestroi 221 bimë kanabisi dhe rreth 400 kilogramë lëndë narkotike të përpunuar, përfshirë 400 gramë sytha të tharë gati për shitje.

Laboratori i brendshëm funksiononte me sisteme moderne të ujitjes, ventilimit, ftohjes dhe ndriçimit, si dhe pajisje elektronike për monitorimin e temperaturës dhe lagështisë. E gjithë kjo infrastrukturë monitorohej me kamera sigurie dhe furnizohej përmes një lidhjeje të jashtëligjshme me rrjetin elektrik, duke shmangur pagesat zyrtare të energjisë.

Dëmi i shkaktuar kompanisë së shpërndarjes nga kjo vjedhje e energjisë vlerësohet të jetë mbi 40 mijë euro. Në operacionin e arrestimit morën pjesë njësi të ndryshme policore, duke përfshirë Njësinë e Sigurisë Qytetare të Albasetes dhe patrullat e Gardës Civile të Muneras.

Gjashtë të arrestuarit janë dërguar para Gjykatës së Villarobledos, e cila vendosi masën e paraburgimit në pritje të procesit penal. Ky rast shënon goditjen e radhës ndaj rrjeteve të organizuara të kultivimit të kanabisit në Spanjë.

Burim: Ora News
— Redaksia ZHURMA