Ku do të luhet ndeshja e tetorit mes Izraelit dhe Kosovës?

NYON — Përfaqësuesja e Kosovës në futboll do të luajë ndeshjen e saj të tretë të Grupit 3 në Ligën B të Ligës së Kombeve më 1 tetor. Megjithatë, kjo ndeshje nuk do të zhvillohet në Izrael, por në qytetin e Debrecenit në Hungari.

Stadiumi Nagyerdei, i cili ka një kapacitet prej 20 mijë ulësesh, do të jetë nikoqir i kësaj përballjeje të tetorit. Vendin e organizimit të ndeshjes e ka bërë të ditur UEFA, pasi Izraeli po vazhdon të shfrytëzojë vende neutrale për ndeshjet e tij.

Kjo paraqitje shënon herën e parë që 'Dardanët' luajnë në Ligën B të Ligës së Kombeve. Rrugëtimi i Kosovës në këtë edicion do të nisë zyrtarisht kundër Irlandës më 24 shtator, me një ndeshje që do të zhvillohet në Prishtinë.

Pas ndeshjes hapëse në Prishtinë, Kosova do të përballet në Vjenë me Austrinë vetëm tri ditë më vonë, më 27 shtator. Më pas, më 1 tetor do të jetë sfida ndaj Izraelit në Hungari, e ndjekur nga përballja tjetër e tetorit ndaj Austrisë në Prishtinë.

Ndeshjet e fundit të edicionit të pestë të Ligës së Kombeve luhen në nëntor. Kosova e pret Izraelin në Prishtinë më 14 nëntor, kurse ndeshjen e fundit e luan kundër Irlandës në Dublin më 17 nëntor.

Përballja me Izraelin ka ngjallur reagime të mëdha edhe në vende të tjera. Kur Shqipëria luajti miqësore në qershor, faqet e FSHF-së në rrjetet sociale u mbushën me komente kundërshtuese ndaj këtij kundërshtari. Kundërshtime të ngjashme janë shënuar edhe në Irlandë.

Në kualifikimet për Evropianin 2024, Kosova mori katër pikë ndaj Izraelit. Ndeshja në Tel Aviv përfundoi baras 1:1, ndërsa në Prishtinë fitoi Kosova me rezultat 1:0. Tashmë përballja e radhës në tokën hungareze pritet të jetë një sfidë e re për futbollistët tanë.

Burim: Koha.net
— Redaksia ZHURMA