Si reagoi Krushevci ndaj posterit me gjuhë urrejtjeje?

KRUSHEVC — Qyteti i Krushevcit në Serbi dënoi fuqishëm, në një reagim zyrtar në faqen e tij, gjuhën e urrejtjes të përdorur në një poster të vendosur para furrës së bukës së një pronari shqiptar. Bashkia e cilësoi veprimin si akt i mundshëm i një individi, që synon të përçajë qytetarët dhe të dëmtojë reputacionin e qytetit.

Posteri, i vendosur pikërisht para dyqanit, përbëhej nga disa fotografi dhe mbante mesazhin: “Mos e harro Gazimestanin. Mos bli te shqiptarët.” Sipas burimit, shqiptarëve në këtë rast iu është referuar me termin përçmues “Shiptarë”, fjalë që serbët e përdorin zakonisht kur duan t'i nënçmojnë shqiptarët.

Në reagimin zyrtar thuhet: “Thirrjet për diskriminim, jotolerancë dhe përçarje nuk kanë qenë dhe nuk do të jenë kurrë qëndrimi i Qytetit të Krushevcit dhe i qytetarëve të tij.” Bashkia shtoi se beson që veprimi synon të dëmtojë reputacionin e qytetit si vend që respekton diversitetin.

Krushevci bëri thirrje që autoritetet të ndërmarrin të gjitha masat e nevojshme për identifikimin e autorit të posterit dhe zbardhjen e motiveve të veprimit. Rasti nxiti menjëherë reagime edhe nga figura të shoqërisë civile serbe, që e cilësuan aktin si nxitje të hapur për urrejtje kombëtare.

Sekretari i përgjithshëm i Lëvizjes së Qytetarëve të Lirë në Serbi, Aleksandar Radovanoviq, ishte njëri nga zërat në Serbi që reaguan ndaj posterëve të urrejtjes në Krushevc, duke kërkuar që autori i tij të dënohet publikisht për nxitje të urrejtjes kombëtare.

Themeluesja e Fondit për të Drejtën Humanitare në Serbi, Natasha Kandiq, i ftoi studentët që prej muajsh po protestojnë në vend, të mblidhen para furrës për të shprehur solidaritet me pronarin shqiptar dhe për të kundërshtuar veprimet etno-nacionaliste.

Rasti vjen pak ditë pas ngjarjeve të 28 qershorit në Gazimestan, kur Policia e Kosovës ndaloi 37 persona, kryesisht nga Serbia, gjatë kremtimit të Vidovdanit. 36 prej tyre u proceduan për thirrje provokuese me elemente të nxitjes së përçarjes, u gjobitën me nga 700 euro dhe atyre që nuk janë shtetas të Kosovës iu ndalua hyrja në vend për tre vjet.

Burim: Koha.net
— Redaksia ZHURMA