Britania ndan 5 milionë paund për Ballkanin kundër emigracionit të paligjshëm

Mbretëria e Bashkuar do të akordojë deri në 5 milionë paund për të mbështetur vendet e Ballkanit Perëndimor, përfshirë Shqipërinë, në luftën kundër emigracionit të paligjshëm dhe krimit të organizuar. Paketa e re e ndihmës u njoftua nga ministri i Shtetit për Evropën në Mbretërinë e Bashkuar, Lord Wood of Anfield, gjatë Samitit të Procesit të Berlinit që po zhvillohet në Mal të Zi.

Financimi synon të ndihmojë institucionet rajonale përmes ekspertizës britanike, trajnimeve dhe shkëmbimit të informacionit. Nga Budva, ministri britanik u shpreh se bandat kriminale përfitojnë nga njerëzit e pambrojtur dhe rrezikojnë jetët e tyre, ndërsa fondet e reja do të rrisin sigurinë e Evropës dhe bashkëpunimin ndërkombëtar.

Pajisjet dhe trajnimet e mëparshme të financuara nga Londra kanë ndihmuar autoritetet e rajonit të realizojnë më shumë se 100 ndërhyrje ndaj emigrantëve që nga qershori 2026. Ndihma e re do të mbështesë gjithashtu Task-Forcën e Përbashkët të Emigracionit, e cila ka zhvilluar operacione në Shqipëri, Kosovë, Mal të Zi dhe Maqedoninë e Veriut.