KQZ aprovon 59.973 pako me vota nga diaspora dhe nis numërimin
Pse u refuzuan mbi 2 mijë zarfe të dërguara përmes postës?
PRISHTINË — Komisioni Qendror i Zgjedhjeve ka nisur zyrtarisht numërimin e fletëvotimeve të para të dërguara nga mërgata përmes postës. Sipas zëdhënësit të KQZ-së, Valmir Elezi, ky proces ka filluar mbrëmjen e së premtes më 12 qershor në Qendrën e Numërimit dhe Rezultateve, ku zarfet e vlerësuara po sistemohen në kuti sipas komunave përkatëse.
Deri në përfundim të ditës së premte, në procesin e vlerësimit të pakove që kanë mbërritur në Kosovë janë përfshirë mbi 60 mijë zarfe. Zëdhënësi Elezi bëri të ditur se nga ky numër janë aprovuar saktësisht 59.973 pako me fletëvotime, ndërkohë që janë refuzuar 2.244 pako të tjera të supozuara.
Shkaku kryesor i refuzimit të këtyre pakove ndërlidhet me mungesën e dëftesës së regjistrimit, një dokument me të dhëna unike që votuesit e marrin nga KQZ. Ky dokument mungonte në gjithsej 2.066 raste të refuzuara, duke bërë që votat e tyre të mos përfshihen në kutitë e numërimit.
Votimi përmes postës ishte i hapur nga data 21 maj deri më 6 qershor, periudhë gjatë së cilës u regjistruan rreth 105 mijë votues jashtë Kosovës. Ky fluks i madh i zarfeve rikonfirmon rolin gjithnjë e më përcaktues që mërgata ka në proceset zgjedhore të vendit.
Burim: Gazeta Express
— Redaksia ZHURMA