Kos: BE po bisedon me qeverinë për amendamentet e Ligjit për Specialen

Komisionarja e Bashkimit Evropian për Zgjerim, Marta Kos, ka bërë të ditur se institucionet evropiane po zhvillojnë bisedime me Qeverinë e Kosovës lidhur me amendamentet për Ligjin për Gjykatën Speciale. Gjatë një konference të mbajtur pas prezantimit të raportit të Bashkimit Evropian për reformat dhe situatën në rajon, ajo ka vënë inë pah se procesi i reformave mund të dëmtohet nga këto ndryshime ligjore.

Kjo çështje është diskutuar në kuadër të zhvillimeve më të gjera rreth rrugës së Kosovës drejt integrimit evropian, ndërkohë që zyrtarja e lartë e BE-së ka folur edhe për hapat e ardhshëm që kërkohen nga vendi ynë. Sipas saj, për të ecur përpara në këtë proces, nevojitet një angazhim i fortë në zbatimin e reformave dhe konsolidim i institucioneve.

Duke elaboruar hapi e radhës drejt anëtarësimit, Kos ka theksuar se kërkohet pajtimi i të 27 shteteve anëtare për t’i kërkuar Komisionit Evropian përgatitjen e opinionit për aplikimin e Kosovës. Ajo ka shtuar se bashkësia evropiane është e gatshme ta ndërmarrë këtë hap, por për të bindur vendet anëtare, Kosovës i duhen institucione të qëndrueshme dhe përparim i dukshëm në reforma.

Në lidhje me qeverisjen e re dhe sfidat aktuale, komisionarja ka shprehur pritjet e saj që shteti të ketë mundësinë të ecë përpara. Megjithatë, ajo ka tërhequr vërejtjen se amendamentet në Ligjin për Specialen mbajnë rrezikun e minimit të arritjeve të deritanishme, çka ka bërë që dialogu ndërmjet palëve të jetë i domosdoshëm.

«Tash me qeverinë e re, shpresoj që shteti ta ketë mundësinë të ecë para», ka deklaruar Marta Kos, duke shtuar se «amendamentet në Ligjin për Specialen rrezikojnë ta minojnë çdo përparim, por tashmë jemi në dialog sa i përket këtyre amendamenteve me Qeverinë e Kosovës».

Ajo ka përsëritur gjithashtu se sa më i fortë të jetë bilanci i vendit në reforma, aq më i fuqishëm do të jetë argumenti për integrim, duke bërë thirrje për ruajtjen e stabilitetit institucional.