Raporti i BE-së përmend Kurtin dhe zyrtarët për gjuhë të ashpër ndaj gazetarëve
Komisioni Evropian ka publikuar Raportin për Kosovën, duke evidentuar dhjetëra raste të sulmeve, kërcënimeve dhe gjuhës së ashpër ndaj gazetarëve.
Redaksia ZHURMA · · Përditësuar · 2 min lexim
Raporti i Komisionit Evropian për Kosovën ka adresuar kritika për lirinë e shprehjes dhe të mediave, duke evidentuar se gjatë periudhës raportuese janë regjistruar 35 raste të sulmeve fizike e verbale apo kërcënimeve ndaj gazetarëve, çka përbën një rënie të ndjeshme krahasuar me vitin paraprak. Dokumenti vëren se Kosova ka garanci të përshtatshme ligjore, por mjedisi për funksionimin e lirë dhe të pavarur të mediave kërkon përmirësim.
Në raport përmendet se sulmet përfshinin pengimin e punës nga zyrtarët e sigurisë, si dhe akuza e gjuhë të ashpër nga zyrtarë të lartë qeveritarë, përfshirë kryeministrin Albin Kurti, drejtuar gazetarëve dhe mediave. Sipas dokumentit, zyrtarët publikë duhet të përmbahen nga retorika që vë në shënjestër ose diskrediton gazetarët, ndërsa sulmet dhe intimidimi ndaj tyre duhet të dënohen.
Gjatë së njëjtës periudhë, një kameraman u arrestua dhe u mbajt përkohësisht në paraburgim nga Policia e Kosovës, kurse të paktën katër persona u ndaluan për kërcënime, ndërsa nuk u regjistrua asnjë padi strategjike kundër pjesëmarrjes publike. Raporti evidenton gjithashtu ngacmimet në internet, shpërndarjen e të dhënave personale, presionin ndaj mediave, krizën financiare të transmetuesit publik dhe mungesën e transparencës në pronësi e financim, krahas kërkesave për harmonizimin e ligjeve dhe shtrirjen e kompetencave rregullatore te mediat online.
