Konjufca: Kosova synon anëtarësimin e plotë në Frankofoni
Zëvendëskryeministri Glauk Konjufca ka marrë pjesë në Konferencën e 48-të Ministrore të Frankofonisë në Kamboxhia.
Redaksia ZHURMA · · Përditësuar · 1 min lexim
Zëvendëskryeministri dhe ministri i Punëve të Jashtme dhe Diasporës, Glauk Konjufca, ka riafirmuar synimin e vendit për t’u bërë anëtare e plotë e Organizatës Ndërkombëtare të Frankofonisë. Gjatë pjesëmarrjes në Konferencën e 48-të Ministrore të Frankofonisë që po mbahet në Phnom Penh të Kamboxhias, ai ka shprehur qëndrimin se shteti është i gatshëm dhe ka kapacitet t’i marrë përsipër të gjitha përgjegjësitë që burojnë nga ky anëtarësim.
Sipas njoftimit të bërë në platformën X, Konjufca ka falënderuar zëvendëskryeministrin dhe ministrin e Punëve të Jashtme të Kamboxhias, Prak Sokhonn, për drejtimin e konferencës dhe mikpritjen. Duke përmendur Samitin e 20-të të Frankofonisë, ai ka theksuar se thirrja për riinvestim në paqe ka rëndësi të veçantë për vendin, i cili e ka ndërtuar demokracinë pas luftës, ndërsa ka shtuar se pajtimi i vërtetë kërkon të vërtetën, llogaridhënien dhe perspektivë për të rinjtë.