Haxhiu kërkon sqarim nga KE për këngën nacionaliste serbe në Bruksel
Kryetarja e Kuvendit reagon pas interpretimit të një kënge nacionaliste në hapjen e Forumit të Zgjerimit të BE-së.
Redaksia ZHURMA · · 1 min lexim
Kryetarja e Kuvendit të Kosovës ka reaguar pas interpretimit të këngës nacionaliste serbe «Oj Kosova, Kosova» në një aktivitet të organizuar në Bruksel, në prag të Forumit të Zgjerimit të Bashkimit Evropian. Përmes një postimi në rrjetin social Facebook, ajo e ka cilësuar shqetësues këtë zhvillim, duke vlerësuar se ngjarja promovon pretendime territoriale ndaj Republikës së Kosovës.
Haxhiu theksoi se një aktivitet që ka për qëllim afrimin e vendeve të rajonit me Bashkimin Evropian nuk mund të përcjellë mesazhe të tilla, të cilat bien ndesh me parimet e paqes, fqinjësisë së mirë dhe respektimit të sovranitetit të shteteve. Sipas saj, institucionet evropiane duhet të tregojnë kujdes dhe ndjeshmëri ndaj historisë së rajonit dhe mesazheve që përcjellin.
«Presim sqarim nga Komisioni Evropian për këtë përzgjedhje të papërgjegjshme», u shpreh ndër të tjera kryetarja e Kuvendit, duke kërkuar llogaridhënie nga organizatorët për përzgjedhjen e kësaj kënge në hapjen e forumit.