Kolektivi feminist akuzon sektorin e ndërtimit pas vdekjes së punëtorit 20-vjeçar

PRISHTINË — Kolektivi për Mendim të Mirë dhe Veprim Feminist reagoi pas vdekjes së një punëtori 20-vjeçar në një vendpunishte ndërtimi në Prishtinë, duke kritikuar kushtet e punës dhe sigurinë në sektorin e ndërtimit. Në një komunikatë, grupi e quajti rastin 'edhe një episod fatal i kapitalizmit të egër e vrastar' që, sipas tyre, 'nxori edhe një kufomë' nga punishtet dhe la të tjerë të plagosur.

Kolektivi bëri të ditur se ka realizuar edhe grafite në Prishtinë si reagim ndaj rastit, ndërsa akuzoi institucionet dhe sektorin e ndërtimit për neglizhencë ndaj sigurisë së punëtorëve. Sipas kolektivit, punëtorët e ndërtimit përballen me kushte të rënda pune dhe mungesë të mbrojtjes së duhur në vendet e punës.

'Mafia e ndërtimit tash e sa kohë po ngrehë godina mbi gjakun e punëtorëve, ndërsa shteti i bëhet hisedar në trashje të pushtetit dhe shtypje kriminale të klasës punëtore', thuhet në komunikatë. Kolektivi shton se për 'kapitalistët mafiozë', kurbani i fitimit janë njerëzit që flijohen për t'i ushqyer apetitet për fitim e grumbullim.

'Të keqpaguar, të keqtrajtuar e të detyruar të punojnë edhe në mot përvëlues, punëtorët e ndërtimit punojnë në teh të ekzistencës', thuhet më tej në komunikatë. Kolektivi shton se institucionet shtetërore 'herë shiten e herë bëhen indiferente' ndaj gjendjes së klasës punëtore.

Në komunikatë thuhet se kushtet e punës dhe gjendja sociale janë pjesë e një problemi më të gjerë shoqëror, të lidhur me atë që kolektivi e quan 'partneritet kapitalisto-shtetëror'. Grupi thekson se kushtet materiale po i çojnë shumë punëtorë në marrëdhënie pune çnjerëzore dhe në kufij ekzistence.

Kolektivi bëri thirrje për organizim dhe mbrojtje të të drejtave të punëtorëve, duke kërkuar mobilizim kundër çdo pushteti që, sipas tyre, sundon nëpërmjet shpërfilljes dhe zullumit ndaj klasës punëtore.

Burim: Ekonomia Online
— Redaksia ZHURMA