Pse rikthehet Knezheviq te çnjohja e Kosovës pas 17 vitesh?

PODGORICË — Sa herë që përballen me mungesë idesh për çështjet reale, politikanët pro-serbë në Mal të Zi rikthehen te Kosova. Lideri i DNP-së, Milan Knezheviq, ka njoftuar se do të riaktualizojë iniciativën për tërheqjen e njohjes së Kosovës, këtë herë jo vetëm në komunën e Zetës, por edhe në nivel shtetëror.

Knezheviq deklaroi se ka marrë mbështetjen e kryesisë së DNP-së për procedura që synojnë shfuqizimin e vendimit të Malit të Zi për njohjen e Kosovës. Ai paralajmëroi se këshilltarët e DNP-së në komunat ku partia ushtron pushtet do të dorëzojnë iniciativa të ngjashme, ndërsa deputetët do të kërkojnë miratimin e një rezolute që do ta obligonte qeverinë të tërhiqte njohjen.

Megjithatë, analistët politikë e shohin këtë si përpjekje për mobilizimin e votuesve para zgjedhjeve të ardhshme parlamentare. Pedagogia universitare Nikoleta Djukanoviq vlerësoi se iniciativa përfaqëson vazhdimësinë e politikës së DNP-së, por njëkohësisht është përpjekje për të aktivizuar elektoratin. Sipas saj, edhe vetë Knezheviq është i vetëdijshëm se nisma nuk ka gjasa reale të ketë sukses institucional.

"Mal i Zi e ka njohur Kosovën më shumë se një dekadë më parë dhe ky vendim është pjesë e politikës së jashtme dhe obligimeve ndërkombëtare të shtetit, të cilat nuk ndryshohen përmes iniciativave ditore politike", theksoi ajo. Drejtoresha e Qendrës për Gazetari Hulumtuese, Milka Tadiq Mijoviq, shtoi se Knezheviq po merret me Kosovën sepse "nuk është në gjendje të ofrojë program ekonomik apo reforma që do të përmirësonin arsimin, shëndetësinë apo mbrojtjen e mjedisit".

Ekspertët juridikë kanë sqaruar se çdo vendim i komunave për "çnjohjen" e Kosovës do të kishte vetëm karakter deklarativ dhe nuk do të prodhonte asnjë efekt juridik, pasi njohja më 9 tetor 2008 gjatë qeverisë së Milo Djukanoviqit ishte vendim i qeverisë, jo i pushteteve lokale. Pavarësisht kundërshtimeve të vazhdueshme nga partitë pro-serbe, ky vendim mbetet pjesë e politikës zyrtare të shtetit malazez dhe e orientimit të tij euroatlantik.

Burim: Gazeta Express
— Redaksia ZHURMA