KEK-u shpall tender me vlerë qindra mijëra euro
investimi fokusohet në njësinë A3
PRISHTINË — Korporata Energjetike e Kosovës ka shpallur aktivitet të ri të prokurimit për furnizimin dhe instalimin e transformatorit energjetik T3A. Vlera e parashikuar e tenderit është 550 mijë euro. Sipas njoftimit për kontratë, projekti ka të bëjë me furnizimin dhe instalimin e transformatorit energjetik T3A 15.75/6.3 kV, me fuqi 20 MVA për njësinë A3, ndërsa realizimi i tij do të bëhet në Termocentralin "A".
Dokumenti parasheh se kontrata do të ketë një afat realizimi prej 215 ditësh nga momenti i nënshkrimit, ndërsa operatori ekonomik fitues do të duhet të ofrojë siguri të ekzekutimit në vlerë prej 10 për qind të kontratës. KEK ka vendosur kritere të detajuara për operatorët ekonomikë.
Ndër to kërkohet që ofertuesit të dëshmojnë përvojë në realizimin e projekteve të ngjashme, duke provuar se kanë furnizuar dhe vënë në funksion të paktën një transformator me fuqi dhe tension të kërkuar ose më të lartë gjatë tri viteve të fundit. Po ashtu, prodhuesi duhet të dëshmojë se ka prodhuar dhe furnizuar disa transformatorë të ngjashëm në vendet e Bashkimit Evropian, si dhe të posedojë certifikatat ISO 9001, ISO 45001, ISO 14001 dhe laborator të akredituar sipas standardit ISO 17025.
Dokumentacioni kërkon gjithashtu deklarim se transformatori do të ketë certifikatë Euro-1 dhe jetëgjatësi minimale prej 25 vitesh. Tenderi do të zhvillohet me procedurë të hapur, ndërsa kriter për dhënien e kontratës do të jetë çmimi më i ulët.
Burim: Ekonomia Online
— Redaksia ZHURMA