Si do të mbrohen familjarët dhe bizneset e vogla me çmime të rregulluara energjie?

TIRANË — Ministri i Infrastrukturës dhe Energjisë, Enea Karakaçi, deklaroi se projektligji i ri "Për sektorin e energjisë elektrike" garanton ruajtjen e mekanizmave mbrojtës për familjarët dhe bizneset e vogla, duke mundësuar vijimin e çmimeve të rregulluara edhe në kushtet e liberalizimit të tregut.

"Ne kemi bërë një negociatë të gjatë me Sekretariatin e Komunitetit të Energjisë dhe Komisionin Evropian", tha Karakaçi gjatë prezantimit në Komisionin për Burimet Natyrore. Çmimet do të përcaktohen nga ERE në kuadër të detyrimit të shërbimit publik.

Projektligji shërben si baza kryesore për rregullimin e sektorit në dekadën e ardhshme. Para tij, Shqipëria kishte ligjin e 2015-s dhe atë të 2003-s. Tani synon integrimin evropian dhe modernizimin e tregut.

Ky është një nga elementët kryesorë të Kapitullit 15 të negociatave me BE-në për energjinë, pjesë e Planit të Rritjes së BE-së për Ballkanin Perëndimor. "Me miratimin e këtij ligji lidhet edhe një komponent financiar në formën e një granti nga Bashkimi Evropian", shtoi ministri.

Shqipëria mori konfirmim të plotë nga institucionet evropiane për përputhshmëri me direktivat. "Jo të gjitha shtetet kanë arritur ta marrin këtë konfirmim. Serbia, për shembull, e ka miratuar ligjin përkatës para nesh, por i është kërkuar amendimi i tij", theksoi Karakaçi.

Ligji i ri modernizon sektorin, forcon rolin e konsumatorit dhe sjell koncepte të reja: depozitimin dhe ruajtjen e energjisë, agregimin e prodhuesve-konsumatorë, komunitetet e energjisë, dhe për herë të parë rregullon stacionet e karikimit të automjeteve elektrike.

Pavarësia e ERE-s garantohet sipas standardeve evropiane. "Raportet e Sekretariati të Komunitetit të Energjisë konfirmojnë se Shqipëria ka arritur të sigurojë pavarësinë institucionale të ERE-s", tha ministri. Vendet e tjera të rajonit ende e kanë të pambaruar këtë proces.

Burim: ATSH
— Redaksia ZHURMA