Jeronim De Rada lindi në Kalabri dhe u bë ideolog i Rilindjes
Kujtohet jeta dhe vepra e shkrimtarit, poetit dhe folkloristit të shquar arbëresh, Jeronim de Rada.
Redaksia ZHURMA · · 2 min lexim
Më 19 nëntor të vitit 1814, në Makia të Kalabrisë lindi Jeronim de Rada, i cili u bë ideolog dhe frymëzues i Rilindjes Kombëtare Shqiptare. Jeronim De Rada u shkollua në kolegjin e Shën Adrianit në Shën Mitër Korona dhe më 1834 shkoi për të studiuar drejtësi në Napoli, ku u përfshi në lëvizjen politike dhe kulturore të kohës. Gjatë vitit 1848 ai nxori gazetën e parë shqiptare “L’Albanese d’Italia”, ndërsa pas mbylljes së saj u rikthye në fshatin e lindjes, ku qëndroi deri në fillim të viteve ’60 të shekullit të 19-të.
Nga viti 1861, ai u shfaq si një nga figurat më në zë të Rilindjes Kombëtare, duke botuar vepra të rëndësishme si traktatin “Parimet e estetikës”, “Lashtësia e kombit shqiptar” dhe “Rapsodi të një poeme arbëreshe”. De Rada mbajti korrespondencë me personalitete evropiane dhe patriotë shqiptarë, ndërsa më 1878 përkrahu Lidhjen Shqiptare të Prizrenit dhe ngriti zërin kundër gjymtimit tokësor të Shqipërisë. Ai dha një ndihmesë të çmuar edhe përmes revistës “Flamuri Arbrit”, të botuar në vitet 1883-1885.
Shkrimtari, poeti dhe folkloristi u nda nga jeta në moshën 88-vjeçare, më 1903, në Kalabri. Në arkivin e Agjencisë Telegrafike Shqiptare ruhet një foto e bustit të tij nga viti 1963, i cili i u dhurua komunitetit arbëresh të Kozencës.