Bajrami: Kompromisi demokratik nuk duhet të zhbëjë shumicën e votës
Analisti thekson se marrëdhëniet mes Kosovës dhe Shqipërisë duhet të zhvillohen duke respektuar plotësisht sovranitetin dhe përgjegjësitë e secilit shtet.
PRISHTINË — Publicisti Isuf B. Bajrami ka publikuar një analizë ku thekson se sovraniteti në një qeverisje demokratike u takon qytetarëve dhe jo partive politike. Ai vlerëson se institucionet nuk janë pronë private dhe se marrëveshjet politike duhet të nisin nga respektimi i vullnetit të shprehur me votë.
Sipas Bajramit, kompromisi demokratik në një sistem parlamentar është i domosdoshëm, por ai nuk duhet të zhbëjë shumicën e krijuar nga vota. Kompromiset nuk duhet të barazojnë artificialisht mandatet e mëdha me ato më të vogla, duke deformuar raportet reale që qytetarët kanë përcaktuar.
Çdo zgjedhion shërben edhe si vlerësim për vendimet e kaluara politike që kanë prekur interesat strategjike të Kosovës. Bajrami thekson se shoqëria ka të drejtë të kërkojë transparencë për menaxhimin e pasurisë publike, ndërmarrjet shtetërore, politikat e decentralizimit dhe marrëveshjet diplomatike me ndikim afatgjatë.
Sa i përket dialogut ndërmjet Kosovës dhe Serbisë, ai sqaron se ky proces nuk duhet të mbetet i kufizuar vetëm te liderët politikë. Çdo marrëveshje që prek kompetencat shtetërore ose organizimin territorial duhet t'i nënshtrohet standardeve kushtetuese dhe debatit transparent publik.
Lidhur me diplomacinë, Bajrami thërret për respektimin e Konventave të Vjenës për marrëdhëniet diplomatike. Ai nënvizon se partneritetet ndërkombëtare duhet të forcojnë institucionet vendore dhe jo t’i zëvendësojnë ato, duke siguruar barazinë juridike, mosndërhyrjen në çështje të brendshme dhe respektin reciprok ndërmjet shteteve sovrane.
Analiza e tij trajton edhe raportet ndërmjet Kosovës dhe Shqipërisë, duke i cilësuar ato si jetike në rrafshin historik dhe strategjik. Megjithatë, ai vëren se ky partneritet duhet të ndërtohet mbi respektimin e kufijve institucionalë, pa krijuar tensionime apo paqartësi politike ndërmjet dy shteteve.
Bajrami e mbyll shkrimin duke përsëritur se shteti ndërtohet mbi institucione të qëndrueshme dhe jo mbi individë të veçantë. Sipas tij, askush nuk është automatikisht i paprekshëm për shkak të historisë së tij politike, andaj çdo përgjegjësi publike kërkon llogaridhënie të vazhdueshme para sovranit.
Burim: Fjala
— Redaksia ZHURMA
